Nabit nasep til tumuli tang na neta usilien tena vatiang, vatiang xa bemei bemei mei bas xamem e metimel tahal Edu.
Melele ena matadi, inou, mama, del atuli xatel, matadi paveh, paveh taxa ioxor; mama di misuppang. Misuppang, inou napusi tu a vatiang bemei di migeih. Mama di mikuk miso anien ba de na sospen ba de upang; ma di nabiteni mi mama xatel nabitene,
"Mama xamitel tohe toha kamanon e sukul."
Vengen xa napusi nim taaxeih ti vatiang xa inou natmue, kilaen navan e taem ok vatiang xa temmei, texeih xa texeih xa texeih texeih. Teli sen vatiang xil ngasen xa di bas xamem.
Ma di nasul mama xatel tuok nabitene "mama, tohe klasrum vena vatiang vammei vaxehik xiak!"
Tati del mama xalu, haromue xil lammei terak mileh rat xalu ngamu luba. E inou tang del mama xatel mama del tutut atuli xatel matadi; ma di nasul xatel xa matohe nesau, e xatel di latasuppang, di latasuppang; latemanin vatiang bemei mei migeih; ma nasul xatel mun va tei "mama toloh!"
Ma va takes mama mitammea, mileh atuli xatel Rebeka, Noume, del Erima Saul, ne Rosina, lataloh latdiamu lataba.
Ma latbitene "tati, e anien?"
Naga "toha toha toha! Vatiang immei ma inou nipo anien sung niloh nihat."
Ma xatel lataloh latabe klasrum; melele lataloh latbe klasrum, inou nada natemanin; vatiang bemei mei buvul liei xil; mei buil liei mei buil vetei. Inou di namue di napusi mak tang, nagehik xat upang, anien meses, nabar na neta anien, nabare sospen napo naloh; naloh nabe hu.
Ma taem xa melele naloh nabe hu, di nabe trikim ut hosil xil sutang xolsusei. Ut hosil mikiri, ut liei di mikiri, e inou naloh naba; naloh naloh naloh naloh va ba nabe klasrum. Ba napus mama xatel, madi e klasrum.
Melele xa madi klasrum sung, di malaxat vatiang. Vatiang migo nesau mak bemei, ale vatiang migo e tan igak bemei; e vatiang go e tan bemei. Ma taem xe vatiang xe go e tan bemei, go nesau bemei, lubisuu vari igak lube joen lubisuu vari igak, lukilkilis ni nim.
Ma nim mohulong nim kava mohulong mimot, ale nim ma tati mun mot. Ale paveh, paveh xa da iaxor, de pavah xa inou naporohoni mun tang, pavah mot, nim mot, nim mohulong mot.
E xamem maba mabe sef madinga e hu nesau; rut xamem labe sef ladi e tispenseri, rut xamem lamue lagus ladi klasrum xil.
Ma taem xa vatiang be tan, inou samples e tri aklok vongien, maakue tamu nousap, nammei nagur toj tang, nagur toj napueou e liei xil goni mago, vetei. Napueou xorau xil tang nammei, nammei, nammei, mei, mei, ma melele mei nadoxoh tim. Nadaxat toj de nim kava, nim kava tovuol. Nammei nalang ves nim mohulong mavan, nim mohulong tovuol. Nalang ves na paveh, paveh meru.
Napus nim ma Jon tang tehe be sef da, ale nim ma ne Vava Betsi, iaxa da ioxor, xi be sef da.
Ma nadilamun naba, ba nabiteni mi mama xatel "u mama, nim maratel mikiri bus; nim kava ma tua mot, nim mohulong maratel mot."
Ma maakue sung madilamun mammei; melele xa madilamun mammei, mapus rute xil ak.
Inou neta tei xa tehos ni nou ne, natpo jenso e ba natepat nattanga klasrum. Taem xa vatiang be tan maakue, napo jenso nammei nadei susei nammei; matammei matammei mei matastal, rut na toti ta vatiang, ma nabe storem goni ap, di vatit ngai ioxor, vatit vetei, vatit ngai; ma matammei mammei madi tim di nadilen na kava.
Wik tei, madi tim sung, wik tei, wik tei takes napolni pavah. Uhil pavah xa ioxor. A inou naporohoni tang, napolni na vateang bus, inou nammei sung mei napolni paveh. E nim kava tang, na, mimue nataaleh leleni mu vavus, nim mahulong mavan nataaklin xolesi mu; e melele xa matammei, matastal tim.
Help xil, moletin xil lasasa anien bemei, lasa na tapolen, lasa tapolen, masoxat nim. Ale melele xa matsoxat nim, lasa utiei xil. Utiei xil goni utut pin, tuav pin xil ma lamue lasa sitling xil bemei, malih pin. Malih pin xil ak, malih pin xil ak na pin xil ak be tuav pin, tangan xa, mue neta iha ngan xamem e taem xa iva, ma muleh huite muani. A rute xamem xil di lastaat di lamue labe laba lalih nohou; lalih kumal sae, lalih kavis sae. A na eid xil bemei, lasa anien, lasa sitling xil, a lasa tapolen xil tangan xa xamem mulih rilamun ni e nohou namem xil e ti muani.
Ale neta tei xa inou napusi napusi mue neta, da taxeak goni tutouen namem oei mamem temes; ale moletin xil laba ba lapol rilamun ni oei, oei bemei.
Ale, fren namem, fren xil, metalo xil lamue lapusi e e, oei mamem taave sef ti. Ma di lasa moletin xil goni na neta Save the Children's Fund del ADRA lammei di lasa na plastik oei mi xamem, di lasa na tapolen mi xamem. Ale di laso merisin be oei, tokta xil lammei.
E metalo tei mun mei tete visal xamem isen Elena, iou, Elena tehe helpem xamem tehe hau; misepini famili xil, misepini famili xil bitene "famili navan xil, limue limas lihe savaev, limas lihe savaev." Ma mipolni rut na eid xil bemei del goni na kavis xil.
Ma lammei laso xamem, di maso kavis xil xamem, mamue malih kumal na xamem, malih, mastaat malih maniok. His samem xil mistaat meul, kumal samem xil mistaat meul ngamu, e itoxoh xos aveti ihe tol mun a mu tri manis o aveti ihe tol. Di e xamem mummei mun muhe savaev rilamun; ut ut liei be krin. E ihur ihur aveti ihe tol e aveti ihe tol mu ihe hat. Tangan xa meulien na meletin, vu meulien na na holesok xil immei mun mei ihe setel ixoni ngan xa tetiamu.
Xos na tumulien tak nabit nihiteni, ena rin tena nabit nihiteni, na nim xil xa be be iou di matalaxat xei hen ta vateang nabit nihiteni mak a: xamem rute di mabitene, mometu namem xil di labiteni labitene Edu tehe ripitem rilamun ni 1951 xa Edu na neta tan be tehas xil Epi, e saeklon tei xa tehas xil e 1951; ma moletin hau tava tang tahal Edu latamet pat 1951.
Ena 2015, ga this cyclone mabe laki, mabe presem Hii ven xa ti xamem taamet vari. Meulien namem tehe sef e he Hii meulien namem, malonge bos vengen xa ti xamem taamet, mometu namem xil tutut haramue namem xil xamem vus. Mataakil ti xamem taamet; e iven nim kava mamem xil mue mikiri e meulien namem tehe sef.
Xos xi nen tak nabit nimue nihit tumulien tena vatiang, e nammes xamim ngasen; nammes Elena mun vengen xa xi tete visal xamem; sipa.