Ouk diamu inou nabit, namit sepinien tena taem xa vatiang tehas xamem, hariken.
Nim xa xiak be ma ne tila navan xal pap navan. Taem xa vatiang bit vammei, bemei e vongien. Ma meletin xil, holu lalong nius mistal e retio, ena tivi be pasem, be biteni ena mopael be pasem mesej: TVL, Digicel, xa meletin xil limas lihe priperem ni holesok nae xil, lihe mitim vatiang xa immei xie.
Ma taem xa vatiang bit vammei, melengien, xametel matleherat kava lasoni igak. Matleherat kava xil ak, matlingi ba di tan igoxor. Di matso ploks, pak suhon ba da xati.
Nim xa xiak, napani, taem xa vatiang bemei, gup rat ploks xa xie, mot bemei tan. Hale igak, oei mileh, flat. Mileh go hu xa xie, bemei mei be, be joen del poal, presa ta ni gehik, miloh bemei tim. Miloh bemei, mei mileh bemei ige xil ak, nim xil vus e metimel xa xiak, oei be insaet. Oei popol e nim xil; inou nim mavan xie, oei bemei be insaet en, mileh lelep bemei be insaet.
Nim xil holu tava tang, hariken mu vateang xa bemei xie, migup lelen nim xil. Pavah nametel xa da ixor, vatiang bemei gur rati, kava igak miguri misoni bemei de ige. Nim mavan vatiang bemei, gur rat wan saet kava, ba boxol wan saet rin xor; us bemei insaet, buk navan xil iaxa di xile holesok xil, memer ma bus. Oei mileh bemei, meletin mikaakau hale, oei doxol igak, flat, doxol igak.
Ba ut milan, taem xa vateang be stop, us taamus ti, inou napo hama, nagur pinspa, nammei mei napueou nabe nesau, ba naleherat tiba naleherat kava xil, ma naleherat sehni. Naso tiba xil ba di rin ok, ngan xil xa bos, ngan xil xa misa, be toti upang gani. Kava xil xa di xie, ngan xil xa misa be toti.
Ouk, taem xa vateang ak bemei, meletin xil holu lalonge xa labit vateang bemei, vateang ak migehik tava tang, paoa nen gehik. Bemei xamem mabit ti, mumet, e mabitene ihe tistroem Vanuatu vari, Vanuatu ihe tavorel mun.
Mammes sup vengen xa, vateang ak bemei, mapusi e moletin xil lameul tang, meletin xil labe klat, labesi xil. Di lakaakau, lataalonge ti vasa vahit vatep ti, labesi xil vengen xa lameul, lataamet ti.
E nou, na nabesi nou vengen xa taem xa vateang bemei ba, bas xamem bus, e inou nameul ta nada, nabit nammes sup vengen xa meulien navan meul tang, nataamet ti. Ma mol Vanuatu xil holu, holu lamue labesi xil vengen xa lameul ta ladi, lataamet ti. Ma nabe lusum ni holesok xil holu, anien amem xil e nahou, nim mamem xil mikiri, holesok namem xil, mabe mestem ni holesok xil holu, e meulien namem, mameul ta madi. Ma xamem mabesi xamem vena mameul, mataamet ti.
E inou nabit namiteni vamak, be janis tei xa xouk ada, di agur nou di nasepin xie, e na vitio, xos xa uha mun ena kantri nam, taem xa lisisuk, lihitene labit lalong timu stori midep, uhiteni mi xil, uhiteni mak, sepinien, mesej navan nasani minuk uhitene: mammes pupu ni.
Mol Iglan xil del Ostrelia Niu Zilan USA del kantri sap xil mun, xa ladutou ni xamem, lasa anien, lasa olesok, lasa oei, lasa mani bemei, ena Vanuatu, bemei e kavmen, e kavmen sung, migur mani ak ipol itela xa ipol ihusil susei nen xa meletin xil vus lileh anien olesok xil, ihe vea mu imal mu ataakil ti.
E nammesuk ven xa xouk ammei di agur nou, di nasepin xie, olesok xil vus nakila nabitene taem xa uha mun lisisuk xouk uhiteni. Ma sepinien navan ha ivus ta ige tak, nammes pupu ni xouk vena agur vitio navan, del sepinien navan xa di nabiteni xie.
