Ale inou nitumul husil melele xa vatiang bas xamem.
E Abrim metimel nametel smol stesen be Silimaori. Melele matadi ba duxol miloh vena piniai, e vatiang mei miseten; vatiang mei miseten, naleh tuvava navan xatel matbe nim, matsak ni sisien tei mabus. Matadi nasak pelei rong mametel matapat; tati natel ba di mikuk ni his ametel de hulute pavah.
Matadi nim ma matapat pisi, e e vatiang mei miseten migehik. Mileh uvuei xil usil xil bemei tim; uvuei mikital go, meang del rihap te nim, bemei ni xametel nim; naleh tuvava navan xil masoh makei. Makes tati nae bemei; mei pou ngan xa hokkorong xie Jon luloh ludiamu lube nim ma tati natel xa val, Simon. Ba ba ludi di miloh mun bemei, midel, mideli tutut atuli navan del horamue nen sung lataloh lataba, Papara xal Yaxley.
Ba latdi nim di mikei bit "xouk sung ammei!"
Inou nabit "misakras namat vena vatiang migehik!"
Taem xa nastal nasoh puiteh, naketteh vatiang gur vul lit ahii xa val, misoso ni bemei mileli nim mametel, mei misoket vari de heilep te na vul del nim mametel. Napusi mak, uluk mikan, naloh mun nabe nim.
Tati natel mikei bit "ammei!"
Nabit "misakras namat, xouk ammei ni nou!"
Nasak, nasak, nasakras. Ma mak tang nadalxat palaket ma tutut tuvava navan, napo xat na neta suka, di nadal xat ateli namel, naloh dela vatiang gehi gehik, gehik, gehik; naba ba matdi nim.
Di matkes tati nametel bit "xouk sung ammei, upo his xa okuk ni del hulute iaxai ummei!"
E xi bitene "his taameses ti, pavah meru ngamu!"
Mataloh ba matbe nim, matasak vena neta wido xil ak, vatiang miseten tang, mileh rat kava xil xa matetii tekoxol wido xil. Xamem vus masoh madit mak tang. Mataarotan ti, mataapat ti, madivin tututen xil ngasen labe sto vengen xa na sto mabe sef vuteili. E siting rum be open dat mak tang, xamem vus masoh.
Yaxley xal ne Silvie lupo na katen tei tang tena soliar, ba lutii xat, ba lutii xati de wido; us bas katen ma katen merer be tan. Latpo pak te metu tei sung, mattii koxole de na wido. Mattii koxole, e e, suhil bas ratel holu ma matbulun plaget te tei xil xat eilep xil ak, di mattii xati de wido. Matasak tama be matsakras; napo plaget tei ba nasoso ni be pe na wido ena us di, suhil di ba en ni na neta plaget, e di mita di ba en. Maba ba madi masak ni sisien tei, mapolni famili wosip vongien, masis makikei mabus.
Madi madi ma, vatiang taave tan ti mapolni be va lu nen, ma masak ni sisien tei mun ma bus. E Ahii taamaen xamem ti xa valeh rat kava, kava xil ak galeial galeial bus ti, Ahii taamaen xametel ti. Vengen matdi smol stesen, ut tovuol mun matoloh matohaen.
Ba ma ba duxol na leven xos e mei mikkat. Mei mikkat, makes tati nalu del Tomas, mabitene "xamil luha luleh his xa mukuk ni, mulpo reis xa de pavah na Netty immei ratsi ratoanien."
Xalu lubitene "vatiang gehik, misakras moletin vehe hale vengen ratel tim saratel kava holu."
Misak ni inou nagur pisket tei tang, namue nakipasi, natleh lemon, ma namue neta ni tuvava navan xatel latmu ni, xil ngasen lamu na lemon ok tang lagani del piskit. Anien ok da duxol tu aklok maakue vatiang be tan vuteili mastal ba maleh anien sung mei maga anien natekuk ni tin. E visi xa ipoue xa vatiang migehik, tin mirehi turei maakue e mak tang tuten xil lamea ni maakue, lagani del his xa del hulute rute, temat tang e mak tang lagani. Magani ba duxol maakue ma bus, mapolni sisien tei mun ma bus, mammes Ahii vengen xa milaxat xamem taamaen ti na meulien namem vehe kil vongien ba duxol maakue, mastal mapusi xa e ut miah bos xamem vusien madi bos tang.
Xos nganak be hoxalite tena tumulien tena vatiang xa tehas xamem, nammesuk.